Tulo angol sa bangga, usa niini nabalian og bukog sa liog

CEBU, Philippines - Kritikal ang usa ka 22-anyos nga lalaki kinsa nabalian og bukog sa liog human ang iyang gimaneho nga motorsiklo mibangga sa sementadong pader sa Danao City District Hospital niadtong Biyernes sa tungang gabii sa Sitio Sand, Barangay Poblacion, Danao.

Si SPO1 Reynante Manulat, imbestigador sa traffic section sa Danao City Police Station miila sa biktima nga si Larry Gian Ramos, taga Proper Dungga, dakbayan sa Danao.

Si Ramos gikan sa ilang balay paingon unta ngadto sa balay sa iyang iyaan  sa Barangay Poblacion ug paghidangat niini diha sa kurbadahong bahin sa dalan giingong mipabulhot kini og padagan sa motorsiklo ug wala na niini makontrolar ang manobela sa gisakyan  niining motor hinungdang milahos kini ngadto sa pader sa nahisgutang tambalanan.

Matud ni Manulat nga gumikan sa kusog nga impact sa maong pagbangga nabali ang bukog sa liog ni Ramos.

Ang mga doktor sa Danao District Hospital nga maoy nag-atiman ni Ramos mirekomendar sa pagdala niini ngadto sa Vicente Sotto Memorial Medical Center sa dakbayan sa Sugbo.

Sa laing bahin, duha ka tawo ang naangol human sa panagsungag sa pedal-cab ug motorsiklo sa Sitio Upland, Barangay Poblacion, Dakbayan sa Danao kagahapon sa kadlawon.

Ang mga naangol mao sila si Tomas Cuizon, 60, taga Camalig-Bato, Dakbayan sa Danao, drayber sa pedal- cab nga nasungag ngadto sa motorsiklo nga gimaneho ni Efren Sy, 62, taga Capotatan, Barangay Ginacot sa maong dakbayan.

Matud pa ni SPO1 Manulat nga giingong kusog ang dagan sa duha ka sakyanan dihang nagkabangga kini. Ang duha ka drayber gidala usab ngadto sa VSMMC.  (BANAT NEWS)