Baba sa masuso gi-plasteran

CEBU, Philippines - Mikatag sa Facebook kagahapon ang usa ka hulagway sa bag-ong gipanganak nga bata nga gi-plasteran ang baba niini samtang naghigda sa kuna sa nursery room sa usa ka pribadong paanakan.

Ang Banat News dili mohingalan sa pamilya sa masuso aron panalipdan ang ilang pagkatawo ilabi na sa bata ug ingon man ang tambalanan hangtud nga way kadagkoan nila nga mohatag og opisyal nga eksplinasyon o pamahayag kabahin sa maong hulagway.

Ang maong hulagway gi-post sa Facebook dihang naabtan sa inahan sa masuso ang anak nga dunay plaster nga gisap-ong sa baba niini sud sa nursery room sa pagduaw niya niadtong Biyernes alas-8 sa gabii.

Matud pa nga gipangutana niini ang attending nurse kun nganong adunay plaster ang baba sa iyang anak, apan matud pa nga gitubag kini sa maong nurse nga saba kini kaayo kay magsige’g hilak mao nga gipapitlan niya ang baba sa bata.

Ang amahan nagkanayon nga aduna’y rason ang paghilak sa iyang anak, ug dili tawhanon ang pagsampong og plaster sa baba niini.

Nadiskubre sa inahan nga maong nagsige og hilak ang ilang anak kini tungod kay puno na ang diaper niini. Gikuwestyon sa amahan kun nganong wala nabantayan sa mga nurse nga puno na  ang diaper sa iyang anak.

Sa gi-post sa amahan sa iyang account, kini miingon nga sa dihang giingnan  ang nurse nga ipatangtang ang plaster sa baba sa iyang anak gitubag pa siya niini nga sila nala’y patangtangon. Tungod niini, gisuwayan unta sa inahan nga tangtangon ang plaster apan wala niya kini mabuhat.

Tungod niini, ang nurse matud pa maoy mitangtang sa tape ug nakita sa inahan nga napaksitan ang panit sa iyang anak sa ibabaw nga bahin sa ngabil niini.

Daling gi-report sa inahan ang insidente sa information desk sa maong tambalanan ug gitambagan sila nga dili i-delete ang hulagway para basehan sa ilang imbestigasyon. Gani, mikonsulta na ang mga ginikanan sa bata sa ilang abogado.

Matud pa sa amahan nga dili kini isolated nga kaso ug pwede kining mahitabo sa bisan kinsang bata sulod sa maong tambalanan. Dugang niya nga mura’g gitratar nga usa ka iro ang iyang anak nga gibuhatan niadto sa maong nurse.

Daghang naluoy sa maong post sa amahan, nakakuha kini og simpatiya sa mga netizens ug daghan ang nanawagan nga tangtangan og lisensya ang maong nurse.

Aduna ‘sab miingon nga angay kining ipakita sa kadaghanan aron makamatngon ang ubang tambalanan ug mga nurses aron kapanaminan sa uban.

Ang Banat News misuway og kuha og pamahayag sa maong tambalanan apan miingon lang nakatubag sa telepono nga nag-imbestigar pa sila sa maong insidente. (BANAT NEWS)