Sikyu nga mipatay sa German nadakpan

CEBU, Philippines - Guwardiya nga nakapusil patay sa German national nasikop na sa kapulisan sa bukirang bahin sa Barangay Nangka sa Lungsod sa Boljoon atol sa hot pursuit operation. Si Jerome Niere, sakop sa CQB Security Agency nga guard on duty sa usa ka retirement resort sa Barangay Giwang, Alcoy nga nakapusil patay kang Huns Jurgen Hessy mibutyag nga mi-warning shot siya apan wa mopatuo ang maong langyaw ug tungod kay ngitngit man iya kining gipusil. Si Niere  nadakpan sa Provincial Investigation and Detection Management Branch nga gipangulohan ni Police Senior Inspector Wilson Abot, inabagan sa Alcoy ug Boljoon police kagahapon sa kaadlawon. Matud pa nga diha mitago si Niere sa balay sa iyang igsuon  apan nakabantay kini dayon sa pag-abot sa mga polis ug mikaratel og dagan sa kakahuyan.

Inabagan sa iyang igsuon, nakombinsir kini sa pagtahan sa iyang kaugalingon ug mikuyog sa kapolisan.

Sa pamahayag  ni Niere atubangan sa mga sakop sa media, giklaro niya nga igo lang siya mihimo sa iyang trabaho gumikan kay aduna kuno’y kawatan nga nakasulod.

“Ngitngit man gud kaayo, unya naka jacket man siya ug naka-hood, wala gyud ko nagtoo nga siya (Hessy) ‘to, mitakilid man gud siya, nag- warning na gani ko,” matud pa ni Niere. Gitanggong na sa detention cell sa PIDMB 7 ang suspetsado samtang giandam na ang kasong ipasaka kaniya. (/EIM)(BANAT NEWS)