Mid year bonus sa mga maestra sa toledo madawat na
CEBU, Philippines - Gilauman nga madawat na ning higayona ang mid-year bonus sa mga magtutudlo ug non-teaching personnel sa dakbayan sa Toledo sumala pa sa Department of Education- Toledo City Division.
Matud ni DepEd Toledo City Division Superintendent Dr. Ronald Gutay nga ang maong mga magtutudlo makadawat og katunga sa ilang usa ka buwan nga suhulan. Ang katunga niini sa buwan na sa Disyembre madawat isip year end bonus.
Ang Toledo City adunay dili momenus 1,400 ka mga teaching personnel ug dili moubos sa 100 ka mga non-teaching personnel.
Una nang gipahibalo ni Dr. Gutay nga nang-hire sila og dugang 50 ka dugang mga magtutudlo.
Kini tungod usab nga posibleng adunay pagtaas sa populasyon sa mga estudyante sa pagbukas sa klase sa 2014 hilabi na sa padayon nga pagpatuman sa K +12 program sa Department of Education. Nasayran nga ika-tulo ka tuig na sa pagpatuman sa K + 12 program sa mga tunghaan sa dakbayan sa Toledo. (/EIM)(BANAT NEWS)
- Latest
- Trending
