Rama, 11 officials pakasohan sa Ombudsman

CEBU, Philippines - Ang Office of the Ombudsman-Visayas mihukom nga imbestigahon si Mayor Michael Rama ug ang laing 11 ka opisyal sa Cebu City Hall nga mipirma og kontrata tali sa pribado’ng kontraktor paghimo’g karsada sa South Road Properties (SRP) bisan og walay pagtugot sa City Council.

Si Atty. Euphemia Bacalso, acting director sa Evaluation and Investigation Office sa Ombudsman-Visayas, mimando na ni Mayor Rama ug sa ubang mga opisyal sa City Hall pagsumiter sa ilang counter-affidavits aron tubagon ang kaso nga gipasaka ni kanhi Vice Mayor Joy Augustus Young ug Konsehal Margarita “Margot” Osmeña.

Gawas ni Rama, ang ubang nag-atubang og sumbong mao sila si Rafael Christopher Yap nga maoy tsirman sa Bids and Awards Committee, ubang sakop sa BAC nga sila si Jose Marie Poblete, Dominic Diño, Eustaquio Cesa Jr., Ester Concha, Alipio Bacalso Jr., Jose Daluz III, Nenita Fernandez, Kenneth Carmelita Enriquez, Joel Reston ug Yuri Sesican.

Apil nga gimandoan paghatag og counter-affidavit mao si Bernabe Gilbor, tag-iya sa Supreme ABF Construction, nga gitugyanan nila ni Rama sa paghimo’g karsada alang sa Bus Rapid Transit (BRT) project diha sa SRP nga kantidad og P50.4 milyones. Nahibaw-an hinuon nga ang Supreme ABF Construction wala na mopadayon sa paghimo og karsada bisan og aduna na’y kontrata nga napirmahan human si Gilbor nasayod nga kwestyonable ang pagpirma sa mayor sa mao nga dokumento.

Atol sa sesyon sa konseho kaniadtong miaging tuig ang mga opisyal sa executive department wala makahatag og tukma nga tubag ngano nga nag-una ang pagpirma sa kontrata ni Mayor Rama nga wala pa kini mahatagi og pagtugot sa konseho.

Ang kontrata alang kini sa paghimo og 2.2 kilometros nga karsada alang sa BRT ug humanon unta sulod lang sa 222 ka adlaw.

Ang City Legal Office maoy gimandoan nga moandam sa joint counter-affidavit sa mayor ug ubang opisyal nga nag-atubang og kaso sa Ombudsman. (BANAT NEWS)