Mga kawatan namista sa bilanggoan
CEBU, Philippines - Namista sa sulod sa bilanggoan ang kawatan nga nadakpan sa pagpanglungkab og tindahan sa bag-ong merkado publiko sa dakbayan sa Mandaue alas 2 pasado ang takna sa kaadlawon kagahapon.
Ang nadakpan mao si Jerome Igot, 29, taga Barangay Mantuyong samtang ang biktima mao si Jesus Laxamana, 49, taga Barangay Pagsabungan, pulos sa maong dakbayan.
Si PO1 Jerome Lendio sa Presinto 1 sa Mandaue City Police Office (MCPO) miingon nga nakasulod ang suspetsado sa tindahan pinaagi sa pagligwat sa plywood nga bongbong.
Nadala sa suspetsado ang 30 kilos nga brown sugar balor og P1,200 apan dali nga nasikop sa gwardiya sa merkado nga si Rodolfo Manatad.
Gitahan ni Manatad sa kapolisan ang dinakpan ug gikatakdang pasakaan og kaso. Samtang nadakpan sa kapolisan sa dakbayan sa Mandaue ang mga suspek nga milungkab sa usa ka panimaye sa Barangay Alang-alang ug narekober ang mga gadgets nga gipangkawat.
Ang mga nadakpan mao sila si Jaylord Heyrosa, John Aldrin Lumapas ug Aldwin Gonzaga samtang laing duha ang nakaikyas.
Gihulagway sa kapulisan nga mga local boys ang mga suspek ug giingong mga adis-adis base sa rekord sa ilang buhatan.
Niadtong Mayo 5, nangayo og tabang sa Investigation and Detective Management Branch sa MCPO ang biktima nga si Kate Benica Marunginan dihang gilungkab iyang balay sa Mayol Compound sa nahisgutang lugar.
Niadto lang Mayo 7 nasikop ang mga suspek human sa gihimong entrapment operation.
Tungod usab sa kalampusan nga nahimo sa kapulisan hatagan sila og komendasyon sa ilang labaw nga si Sr. Supt. Petronelli Baldebrin.
Nanawagan ang kapulisan niadtong mga biktima sa pagpanglungkab sa pagduaw sa ilang buhatan sanglit may narekober silang laing electronic gadget nga wa pa masayri kinsa ang tag-iya niini. (BANAT NEWS)
- Latest
