Giunay sa kaubang tulisan

CEBU, Philippines - Usa ka suspetsadong tulisan ang mipusil patay sa iya rang kauban ug miangol sa lain pa nilang kauban kagahapon sa mga alas 12:45 sa hapon diha sa Sitio Libo, Barangay Mohon, dakbayan sa Talisay. Patay nang nadangat ngadto sa Talisay City District Hospital si Victoriano Balungkit, 35, taga Phase I, Deca Homes sa lungsod sa Minglanilla kinsa nakaangkon og duha ka samad pinusilan sa buko-buko ug kritikal ang laing kauban niining si Jerome Pasolohan, 38, nga nalapsan sa bala diha sa iyang buko-buko taga Ward III, lungsod sa Minglanilla.

Si Pasolohan gidala sa Minglanilla District Hospital ug gibalhin kini sa usa sa mga pribadong tambalanan sa dakbayan sa Sugbo.

Ang drayber sa habal-habal nga ilang gisakyan nga si Erwin Alcontin, Jr., 34, taga Sunrise Village, Barangay Pardo, dakbayan sa Sugbo nakaangkon og paso sa buko-buko dihang milahos ang bala gikan kang Pasolohan. Ang suspetsado kinsa daling misibat uban sa usa ka 14-anyos nga bayong-bayong giila lang sa ngalan nga “Patsoy”, taga Barangay Day-as, dakbayan sa Sugbo.

Si Superintendent Reycel Carmelo Dayon, hepe sa kapolisan sa dakbayan sa Talisay mibutyag sa Banat News nga si Alcontin suspetsado usab sa maong hitabo.

Matud ni Dayon nga natahap sila nga dunay kalabotan sa hitabo si Alcontin tungod kay magliku-liko ang tubag sa ilang mga pangutana.

Matud ni Dayon gikan nanulis ang grupo  sa usa ka kolektor diha sa Sitio Libo ug pagkahuman gihapit si  Balungkit apan  pagbalik sa Sitio Libo gipusil ni Patsoy si Balungkit human kini miingon nga di na makigkuyog sa grupo kay paeskuylahon na kini.

Human sa pagpamusil, giilogan ni Patsoy ug sa kaubang menor de edad ang usa ka babayeng nagmotor ug maoy ilang gisakyan pag-ikyas. Si Alcontin wala makasibat tungod sa ka-rattle niini naputol ang yawe  sa motorsiklo ug nabilin ang kaputol sa ignition switch. (BANAT NEWS)