German napusilan sa sikyu patay

CEBU, Philippines - Usa ka German national ang naalaang kawatan ug napusilan patay sa guwardiya sa usa ka retirement resort sa Lungsod sa Alcoy nga iyang gibakasyonan kauban sa iyang asawa  kagahapon sa kaadlawon.

Giila ang biktima nga si Hans Jurgen Hessy, 60,   nagbakasyon sa maong lungsod nga ug nagpuyo sa retirement resort sa Barangay Giwang sa maong lungsod.

Samtang ang guwardiya nga nakapusil patay sa langyaw naila nga si Jerome Niere, sakop sa CQB security agency ug lumad nga taga El Pardo, Boljoon.

Matud pa ni PO3 Emillio Carunggay ang imbestigador sa Alcoy police nga nahinabi sa Banat News, ala 1:40 kagahapon sa kaadlawon samtang nag-roving ang kauban ni Niere nga si Jerry Carolasan sa likod nga bahin sa maong retirement resort,  giingong duna kini nakit-ang “mi-spark” sa ngitngit nga bahin sa maong resort.

Tungod niini dali kini nga mitawag kang Niere nga nagbantay sa front gate sa resort ug silang duha misusi sa dapit ug nakita nila ang usa ka tawo nga nagsuot og itom nga jacket nga adunay hood nga kalit lang midagan pagkabantay kanila.  Matud pa ni Carolasan nga iyang gihangyo si Niere nga bantayan ang maong lugar kay iya pa unta nga pasigaon ang suga sa likod nga bahin, apan nakadungog na lang kini og tulo ka buto sa pusil ug misinggit pa si Niere nga “nakaigo ko bay!”

Apan sa pagsubay pa sa duha sa tawong napusilan, si Hessy diay kadto. Si Hessy daling gidala sa Dr. Ildefonso Alcantara Memorial Hospital sa Dalaguete apan gideklarar kini nga patay na. “Ngitngit man gud ‘to nga area sir kay gipalong na man nila ang suga kay kadlawon na man, wala gyud sila nagtoo nga langyaw diay to ilang napusilan kay midagan man pagduol nila,” matud pa ni Carunggay.

Nakaangkon og tulo ka pinusilan ang maong langyaw, sa kilid sa ulo, dughan ug sa ubos nga bahin sa tiyan nga maoy hinungdan sa iyang kamatayon.

Daling miikyas si Niere  apan iyang gibilin ang iyang service firearm nga 9mm Armscor pistol ngadto ni Carulasan, samtang ang naulahi mitahan usab dayon sa kapolisan lakip na ang iyang 9mm pistol  nga service firearm.

Apan atol sa pagsusi sa kapulisan sa crime scene, nakadiskubre sila og lima ka mga Molotov bombs, usa ka buak nga botelya didto sa  maong lugar nga gituhoang maoy nakita sa gwardiya nga mi-spark nga kalayo.

“Naglibog gyud mi sir og nganong naay Molotov bomb sa lugar, dili pud mi makaingon nga ang langyaw ang naggamit adto, kay didto man mibuto ang usa ka Molotov sa kilid gyud sa balay sa resort,” dugang saysay ni Carunggay. Si Hessy nibakasyon dinhi sa Sugbo kauban ang asawa nga si Anja Christa Barbara Hessy, nga usa usab ka German national ug nangabot sila dinhi niadto pang Septembre isip mga turista.

“Sa pagkakaron dili pa namo ma-istorya ang asawa kay traumatized pa sa hitabo amo lang sigurong balikon,” matud pa sa hepe sa kapolisan sa maong lungsod nga si Inspector Crisanto Abella.

Mao na kini ang ikaduhang higayon nga dunay langyaw nga napusilan patay sa usa ka resort dinhi sa Sugbo, niadtong milabay’ng bulan usa ka Anthony Gilchrist, nga usa ka Briton  ang gipusil patay sa iyang guwardiya nga si Melchor Alciso, Jr. didto sa Daanbantayan human sa ilang mainitong panaglalis kabahin sa trabaho niini. (BANAT NEWS)