Mekaniko gipusil patay

CEBU, Philippines - Blangko pa hangtod karon ang kapolisan kung kinsa ug unsay motibo sa pagpusil patay sa usa ka mekaniko sa Sitio Abuno, Pajac, dakbayan sa Lapu-Lapu sa milabay’ng gabii.

Ang gipusil mao si Recardo Dano Taghoy, 26 ulitawo residente sa maong dapit ug usa ka mekaniko.

Sa pasiunang imbestigasyon ni PO3 Lydo Pinos base sa pamahayag ni Alicia Taghoy, inahan sa biktima nga nananghid kaniya si Recardo nga didto matulog sa panimalay sa iyang iyaan nga anaa ra usab magpuyo sa maong dapit.

Pipila ka gutlo kalit miabot ang usa sa mga silingan niini ug mipahibalo nga gipusil ang iyang anak sa usa ka ngitngit nga dapit. Nakuha sa kapolisan ang duha ka basiyo sa bala nga maoy gigamit sa pagpusil sa biktima.

Gisusi usab sa kapolisan kung wala ba kini  kalambigitan sa ilegal nga drugas. (BANAT NEWS)