Wa’y saka sa presyo sa bugas NFA

CEBU, Philippines - Kusganong gihimakak sa National Food Authority-7 ang taho nga nisaka   ang presyo sa gipamaligyang NFA rice sa kamerkaduhan sa dakbayan sa Sugbo ug sa tibouk Central Visayas.

Kini taliwala sa pagsaka og 50 sentabos sa presyo sa mga commercial rice matag kilo, sukwahi gihapon sa gipaabot nga mokunhod ang presyo sa bugas atol sa panahon sa ting-ani.

Matud sa tigpamaba sa NFA-7, Ma. Lucia Rosales, nga base sa ilang nadawat nga kasayuran ang presyo ra hinoon sa mga premium rice ang nisaka og 50 sentabos.

Si Rosales nagkanayon nga ang ilang buhatan walay kasayuran sa hinungdan sa pagsaka sa mga nag-una ug palitonon kaayong mga matang sa bugas.

Apan siya nagtoo nga posibling lain na usab kining epekto sa naghinobrang kainit karon sa panahon tungod sa pag-igo na sa El Niño phenomenon.

Subling gipahibawo ni Rosales nga ang presyo sa NFA rice nagpabilin sa naandang P27 matag kilo.

Aron pagseguro nga dili gyud mosaka ang presyo sa NFA rice, si Rosales miingon nga ang ilang mga personnel gipakatap sa kamerkaduhan alang sa hugot nga pagmonitor sa presyo sa NFA rice.

Gani gipahibawo ni Rosales nga ang ilang buhatan dili magpanuko sa paglangkat sa lisensiya sa mga rice retailers sa NFA sa higayun nga mapamatud-an sa ilang gipahigayon nga monitoring nga nipahimulos sa kahigayunan pinaagi sa pagpasa sa presyo sa NFA rice. Hinoon iyang gitataw nga sa pagkakaron wala pa sila’y nakonpirmar nga nipasaka sa presyo sa NFA rice. (BANAT NEWS)