Mga baligya duol sa simbahan sa Mandaue gipangsakmit
CEBU, Philippines - Gipangsakmit gyud ang mga baligya daplin sa kadalanan palibot sa National Shrine of Saint Joseph ug Mandaue City Hall atol sa kapistahan kagahapon.
Si Arnold Malig-on sa command center sa City Hall miingon nga nakahatag og kasamok sa mga manimbahay ang pagladlad og baligya sa daplin sa karsada duol sa simbahan. Dugang niya nga ang dalan W.M. Seno nga nagpaingon sa Cebu International Convention Center (CICC) maoy lugar nga gitugot ang pagladlad og mga baligya.
Si Marina Camasi, 44, taga dakbayan sa Danao, nga nahinabi sa Banat News miingon nga naandan na unta nila ang pagladlad sa mga makaon sama sa tagaktak, ampaw, masareal ug uban pa sa atubangan sa simbahan sa matag tinuig nga pangilin sa dakbayan.
Si Edwin Ermac, operation chief sa Traffic Enforcement of Mandaue (TEAM), miingon nga nakahukom sila nga dili na itugot ang pagpamaligya sa maong dapit karong panahona alang sa paghapsay sa maong lugar ug dili mahasol sa pag-agi ang mga manimba ug mga mamistahay. (BANAT NEWS)
- Latest
