Gidunggab buak nga bildo kritikal

CEBU, Philippines - Kritikal ang kahimtang sa usa ka tawo nga gidunggab og buak nga bildo sa iyang liog sa gikasinumbagay nga silingan sa Sitio Upper, Barangay Pandan, dakbayan sa Bogo niadtong Martes sa buntag.

Ang biktima mao si Serwin Sumayang Gomez, 28, ug ang nakadunggab mao si Harry Lloyd Piape Uy nga pulos nagpuyo sa maong dapit. Si PO2 Leonidez Pedrano sa kapolisan sa maong dakbayan miingon nga nag-inom pa ang biktima ug suspetsado sa maong dapit ug wala lamang damha ang kalit nga pagtumaw sa mainiton nga panaglalis.

Ang mao nilang panaglalis misangko gayod sa pagsinumbagay ug gilupig ang suspetsado sa sinukliay sa kinumo ug dihang nakapunit kini og buak nga bildo kalit lang gihansak sa liog sa biktima, nawong ug uban pang bahin sa iyang lawas.

Nadakpan ang suspetsado sa kapolisan samtang ang biktima daling gihatud sa Bogo District Hospital apan gibalhin sa Vicente Sotto Memorial Medical Center sa dakbayan sa Sugbo. Gitanggong sulod sa detention cell ang suspetsado ug giandam ang kasong frustrated murder batok kaniya. (Romeo T.  Limpangog ug Joeylen A. dela Cruz, NORSU Masscom Intern/GMR)

Awhag ni Radaza: Magdaginot sa tubig

Giawhag ni Lapu-Lapu City Mayor Paz Radaza ang mga Oponganon nga magdaginot og tubig nunot sa grabeng kainit sa panahon nga nakaapekto sa mga tinubdan sa tubig.

Matud ni Radaza sagad sa mga residente sa dakbayan nagsalig sa Metropolitan Cebu Water District (MCWD).

Ang MCWD nipahibawo nga hinay-hinay na nga mikunhod ang tubig sa Buhisan Dam tungod sa grabeng kainit.

Ang mayor miingon nga tungod kay isla man ang siyudad, nasayud nang daan ang mga Oponganon nga angay gyud magdaginot sa tubig.

Gimandoan ni Radaza ang mga barangay kapitan sa pagpahimangno sa ilang mga ginsakpan sa mga angayang buhaton aron makapanagana sa grabeng kainit sa panahon. (BANAT NEWS)