Karaang merkado sa Mandaue parking area karon

CEBU, Philippines - Ang bakanteng luna sa karaang merkado nga nahimutang sa luyong bahin sa National Shrine sa Saint Joseph, sa dakbayan sa Mandaue ang mahimong kaparkingan sa mga pribadong sakyanan nga mamista karong adlawa.

Si Edwin Ermac, operation chief sa Traffic Enforcement Agency of Mandaue (TEAM), miingon nga ang mga pribadong sakyanan ilang tugotan nga makaagi sa mga dalan nga mopaingon sa Barangay Centro.

Gihimo kini aron paghatag og kasayun sa mga nagsakay nga mopaingon sa pagsimba, pagpanagkot, ug pag-adto sa panimalay nga ilang pamistahan nga anaa mahimutang sa Barangay Centro.

Dugang pa niya nga ang pagpasulod sa mga pribadong sakyanan sa Barangay Centro mag-agad lamang hinoon sa gidaghanon sa mga sakyanan nga molabay ug mopahunong na sa pagpasulod ang nagbantay nga traffic enforcer kun daghan na usab ang mga sakyanan nga nakasulod sa barangay Centro.

Gitataw ni Ermac nga adunay gidestino nga mga traffic enforcers nga nag-monitor sa gidaghanon sa mga sakyanan nga makasulod sa Barangay Centro.

Kun makita nga napuno na ug maglisod na sa pag-parking maoy ilang himoon ang pagsira sa dalan ug ablihan lamang kini og balik kun daghan na usab ang nanggawas nga mga sakyanan.

Naglakip sa mga dalan nga ilang itugot ang pag-agi ang mga pribadong sakyanan karong adlawa mao ang mga dalan A. del Rosario, S.B. Cabahug, Catalino C. Ouano Avenue, P. Gomez, ug P. Burgos sa Barangay Centro.

Ang maong mga dalan higpit nga gidili ang pag-agi sa mga PUJ, traysikol, taxi ug uban pang matang sa mga sakyanan nga pasaheroan. (BANAT NEWS)