Amahan nangluod, naghikog patay

CEBU, Philippines - Usa ka 73 anyos nga lalaki ang napalgang patay na samtang nagbitay sa usa ka punoan sa nangka didto sa Upper Luy-a, Barangay Lamac, Pinamungajan niadtong  Martes sa buntag.

Ang biktima nailhan nga si Rufino Dagasdas, taga Barangay Don Andres Soriano, dakbayan sa Toledo kinsa nigamit og pisi nga nylon nga gihigot sa iyang liog ug ang pikas tumoy gihigot sa punoan sa nangka. Matud ni PO1 Mark Gorrez sa Pinamungajan Police Station nga usa ka Nicholas del Rosario, barangay tanod sa maong lugar, ang nireport sa kapolisan labot sa nakitang patay’ng lawas sa kakahoyan nga bahin. Sumala sa imbestigasyon, usa ka Cristino Canonigo nga nangahoy sa maong lugar ang una nga nakakita sa patay nga lawas sa biktima.

Matud sa anak sa biktima nga si Rebecca Malusay nga duha ka semana nang milayas ang iyang amahan sa ilang panimalay human sa nahitabong away tali sa ilang pamilya.

Ang patay nga lawas gidala sa St. Francis Funeral Homes ug sa gipahigayung autopsy ni Dr. Sheila Faciol sa Pinamungajan Municipal Health Office nasuta nga pagkawala sa ginhawa ang namatyan sa biktima.

Ang kapolisan wala usab makakita og foul play sa maong panghitabo.  (BANAT NEWS)