Petisyon sa naparot sa pagka-kapitan gipaboran

CEBU, Philippines - Petisyon sa naparot nga kandidato sa pagkakapitan sa Barangay Punta Engaño sa dakbayan sa Lapu-Lapu sa milabay’ng piniliay sa barangay niadtong Oktubre 2013 gipaboran sa korte.

Si Municipal Trial Court in Cities MTCC Judge Francisco Garciano sa iyang hukom mipabor ngadto ni kanhi Konsehal Josie Hayashi nga nagpapiling barangay kapitan niadtong milabay’ng piniliay  batok ni Lourdes Ibag nga mao karoy milingkod nga kapitan.

Sa milabay’ng piniliay, si Hayashi napilde ni Ibag ug miprotesta si Hayashi niadtong bulan sa Nobiyembre 2013 sa pagtoo nga siya biktima sa pagpanikas ug nagtuong siya ang mananaug sa maong bugnong lugaynon.

Sa hukom ni Garciano, nasuta nga milabaw og 176 botos si Hayashi batok ni Ibag human sa recounting sa balota diha sa korte. Si Hayashi nakakuha og 1,601 botos samtang si Ibag 1,425 botos lang.

Gumikan niini, si Garciano mihukom nga si Hayashi ang migawas nga mananaug pagkakapitan sa maong barangay ug dili si Ibag.

Gihatagan og lima ka adlaw si Ibag nga mosumiter sa komento kalabot sa maong kamanduan.

Samtang si Lapu-Lapu City Mayor Paz Radaza sa iyang bahin mipadayag nga wala siyay gipaboran nila ni Ibag ug Hayashi.

Matud pa ni Radaza andam siya nga mopahurar ni Hayashi kung final na ang kamanduan sa korte, apan sa pagkakaron iya gihapon dawaton ang mga transaksiyon ni Ibag sa city hall aron dili maapektuhan ang mga nakalinyang mga proyekto sa maong barangay.

Subay niini gimanduan ni Radaza si Senior Superintendent Armando Radoc ang OIC Director sa kapolisan sa pagbutang og dugang  polis sa maong barangay aron malikayan ang panagsungi sa mga tigpaluyo sa duha ka habig. (BANAT NEWS)