PRO-7 naalarma sa krimen sa siyudad

CEBU, Philippines - Naalarma na ang Police Regional Office 7 sa nagkataas nga ihap sa mga krimen nga nahitabo sa siyudad sa Sugbo.

Nunot niini gimandoan sa PRO-7 si Cebu City Police Office Director Noli Romana sa pagpangita og solusyon sa mga kaso. Matud pa ni Col. Lyndon Lawas, hepe sa Regional Investigation and Detection Management Division sa PRO-7 adunay 22 porsiyento ang pagsaka sa crime volume sa dakbayan sa Sugbo sa unang tulo ka buwan ning tuiga itandi sa samang mga buwan sa niaging tuig.

Ang kasong theft ang misaka og 70 porsiyento, robbery, 44 porsiyento ug kasong carnapping 62 porsiyento.

Gipasabot ni Lawas nga ang kamandoan nga ilang gipagawas ngadto kang Romana nagtumong nga matagaan og tukmang aksyon ang problema. “There is a significant increase in 2014, this is what we noticed for them to take action,” matud pa ni Lawas. Gawas sa dakbayan sa Sugbo, ang mga dakbayan sa Mandaue, Lapu-Lapu ug uban pang mga silingan nga lugar ang apil sab nga ilang gisubay karon. Kini aron usab mapahibawo ang mga lokal nga opisyal sa kahimtang sa ilang lugar ug makahimo sa tukmang aksiyon. (/GMR)(BANAT NEWS)