Dili tanang iho bawal kuhaon — BFAR7

CEBU, Philippines - Mihatag og katin-awan ang Bureau of  Fisheries and Aquatic Resources (BFAR) -7 nga dili tanang matang sa “iho” ang bawal nga kuhaon ug ibaligya sa kamerkaduhan.

Kini human migawas ang report nga grabi ang pagpanguha og “iho” sa kadagatan sa lungsod sa Daanbantayan lakip na usab sa siyudad sa Talisay.

Ang BFAR-7  miingon nga kung basihan ang ordinansa sa kagamhanan sa probinsiya sa Sugbo,  tulo lang ka matang sa species sa  “iho”   ang gidili nga kuhaon ug ibaligya diha sa kamerkaduhan,  kini mao ang  thresher shark, whale shark ug ang manta ray kon salanga. Matud ni BFAR-7 Director Andres Bojos nga way nalapas nga balaod ang mga mananagat nga nanguha og mga hammerhead sharks ug ubang klase sa iho nga wala sa listahan sa ordinansa.

Dugang ni Bojos nga dili endangered species ang mga iho tungod sa kadaghan pa niini.

Matud niya nga  di mahimong hikawan ang mananagat sa ilang panginabuhian. Nasayran nga gawas sa dakbayan sa Talisay,  duna say mga iho nga gipangdakop ang mga mananagat  sa lungsod sa Daanbantayan.

Tungod niini si Daanbantayan Mayor Augosto Corro mihimo na og mga pamaagi aron masumpo ang maong ilegal nga panagat pinaagi sa pagpanghatag og leaflets sa publiko aron ipahibawo sa katawhan kun unsay gidili ug kadtong mga endangered nga mga isda  nga dili mahimong kuhaon ug ibaligya. (/EIM)(BANAT NEWS)