Water subsidy ni Mayor Sonny O. nagpadayon

CEBU, Philippines - Nagpadayon gihapon ang pagpatuman sa gisaad ni Toledo City Mayor John Henry "Sonny" Osmeña nga water subsidy program sa dakbayan sa Toledo. Kini bisan pa man nga nakaung-ong gihapon ang annual budget 2014 sa dakbayan sa Toledo nga P619 million gumikan sa temporary restraining order (TRO) nga gisang-at sa korte nga nagkwestiyon sa legalidad sa pag-aprubar sa budget.

Gani sa talaan sa Toledo City Water District (TCWD), 30 porsiyento na kon dul-an 12 mil ka mga residente ang nakaparehistro sa maong water subsidy program.  Nasayran nga makabenepisyo ang mga konsumidor og tubig sa minimum nga balayrunon nga tag P156 ubos sa maong programa ni Mayor Osmeña.

Nagkanayon usab si TCWD General Manager Raul Abellana nga ang maong paagi sa pagrehistro dakong tabang  aron sa pagsuta usab sa mga konsumidor kinsa kadtong pabilin pang miyembro ug kadtong namatay na nga konsumidor diin nalimpiyuhan  ang record sa TCWD.

Kahinumduman nga ang water subsidy program gisaad kini nga serbisyo sa mayor panahon sa kampanya.( /EIM)(BANAT NEWS)