Cornejo mitahan sa pnp

CEBU, Philippines - Mitahan na sa kapolisan kagahapon  sa hapon ang wanted nga commercial model nga si Deniece Cornejo kinsa usa sa nag-atubang sa kasong illegal detention nga gipasaka sa kampo sa aktor nga si Vhong Navarro.

Sumala pa sa tigpamaba sa Philippine National Police nga si Reuben Theodore Sindac, si Cornejo mitahan sa Camp Crame   alas- 4 sa hapon ug gidala dayon nila kini sa buhatan ni PNP Chief Alan Purisima.

Nagtingkagol na sa prisohan ang mga kaubanan ni Cornejo nga sila si Cedric Lee ug Simeon Palma nga nadakpan sa kapolisan sa miaging buwan didto sa Eastern Samar. Samtang padayong gipangita sila si Jed Fernandez ug Ferdinand Guerrero.

Nasayran nga wala’y pyansa ang kasong serious illegal detention giatubang ni Cornejo.  Si Cornejo mipasangil kang Navarro nga milugos kaniya apan gibasura ang kaso niini sa Deparment of Justice

Ang kolumnista nga si Tony Calvento nga higala usab ni Navarro nisaysay nga gipanid-an na si Cornejo sa miaging adlaw didto sa Boracay human nakadawat og report ang National Bureau of Investigation-National Capital Region nga matud pa nitikang sa maong dapit si Cornejo uban sa iyang mga higala.

Matud pa nga daghang tawo sa Boracay busa maglisod og pangita kang Cornejo ang mga tinugyanan sa NBI.

Gipanglantawan ni Calvento nga posibleng nadala si Cornejo sa tambag sa iyang apohan nga si Rod Cornejo aron motahan sa kapolisan. (BANAT NEWS)