Nanulis sa gwardiya nadakpan
CEBU, Philippines - Nadakpan na sa kapolisan ang usa sa tulo ka tawo nga miilog sa armas sa gwardiya sa bodega didto sa North Reclamation Area (NRA) dakbayan sa Sugbo kaniadtong Sabado sa kaadlawon.
Sa mao nga higayon si Ryan Sebido, 23, sakop sa Fair Security Agency giilogan sa iyang 38 kalibre nga revolver human siya gitionan og kutsilyo.
Human mitaho sa kapolisan ang gwardiya, ang kapolisan dali nga mihimo og follow-up operation ug nadakpan ang suspetsado nga si Dechuco Comedero, 34, taga Riverside, Barangay Canduman, Mandaue.
Positibo nga giila sa gwardiya ang dinakpan ug nakuha pa gayud gikan kaniya ang armas nga ilang gikawat.
Matud sa biktima nga samtang nagbantay siya sa building giduol siya og tulo ka tawo, dayon usa kanila mition og kutsilyo sa iyang tiyan, ang usa abtik kaayo nga nakakuha sa iyang armas nga gitakin.
Ang gwardiya miingon nga wala na lang siya misukol sa kahadlok nga duslakon sa kutsilyo ang iyang tiyan. Ang duha ka kauban sa dinakpan gipangita pa sa mga polis. (/RUB)(BANAT NEWS)
- Latest
