Napulo ka balay ugdaw sa Labangon

CEBU, Philippines - Electrical short circuit ang gituohan nga hinungdan sa sunog nga miugdaw og 10 ka balay didto sa Sitio Sta. Ana, Barangay Labangon kagahapon sa kaadlawon.

Matud sa mga imbestigador sa kabomberohan nga wala’y namatay o naangol sa mao nga sunog apan miabot og P100 mil ang kantidad sa kabtangan nga naugdaw.

Natugaw ang maayo’ng paghinanok sa mga molupyo sa Sitio Sta. Ana dihang nadungog nila ang siyagit sa mga tawo dihang miulbo ang kayo nga giingon nga didto magsugod sa panimalay ni Eleuterio Caresosa.

Ang mga silingan ni Caresosa nagtuo nga electrical short cicuit ang hinungdan sa sunog kay nakakita sila og nagkidlap-kidlap sa wala pa g’yud makadako ang kayo.

Kapin sa oras ang pagkumbati sa kabomberohan usa nila mapawong sa hingpit ang kayo nga miulbo mga lapas sa ala-una sa kaadlawon. (/RUB)(BANAT NEWS)