“Manaygonay” sa jeepney nanulis nadakpan

CEBU, Philippines - Duha ka tulisan nga giila nga mangigoay sa mga pasaheroan nasikop sa kapolisan sa Waterfront Police Station human nila tulisa ang usa ka ginang sa alas- 9 sa miaging gabii. Ang mga suspetsado giila sa kapolisan nga sila si Gilbert Mariposque, 29, ug si Ray Bacalso,24, taga Alaska, Barangay Mambaling sa dakbayan sa Sugbo.

Samtang ang biktima naila nga si Liezelda Asentista, taga Barangay Subangdaku, sa dakbayan sa Mandaue.

Si Chief Insp. Wildemar Tiu nga nahinabi sa Banat News miingon nga sukad pa sila niadtong Disyembre sa miaging tuig nag-monitor sa kalihokan sa mga suspetsado ug nasikop na gyud nila sa miaging gabii.

Matud pa ni Tiu nga sakit kaayo ang gibuhat sa mga suspetsado kay kasagaran mga wedding ring gyud ang ilang makuha.

“Gahia na kaayo, ngilngig na kaayo ning mga bataa,” matud pa ni Tiu kinsa midugang nga sa higayon nga makaigo  sa usa ka lugar mo “lie low” dayon ug  mobalhin sa lain nga lugar.

Sumala pa ni PO2 Geann Paulo Saberon nga nahinabi sa Banat News nga ang duha nasundan nila samtang nagpahigayon sila og patrolya kuyog si PO3 Christopher Sanchez ug nakit-an nila nga nanulis sa pasahero sa usa ka jeep.

Matud pa ni Saberon  nga gihulga sa mga tulisan ang biktima sa pag-ingon nga kung di niini ihatag ang iyang singsing (wedding ring) pamusilon nila sila sa sud sa jeepney. Way nahimo ang biktima tungod sa iyang kahadlok ug dali usab kaayo nga mihulbot sa iyang tudlo sa iyang singsing ug dihadiha nanganaog ang duha ug misakay og laing jeep.

Diha na misiyagit ang mga pasahero ug ang biktima nangayo og tabang maong nakabantay silang Saberon ug gigukod ang duha hinungdan sa ilang pagkasikop.

Narekober sa kapolisan ang wedding ring sa biktima nga mobalor og P8 mil ug nakuhaan usab si Bacalso og usa ka hand grenade samtang si Mariposque nakuhaan og kalibre .45 nga pistola.

Kagahapon sa udto, dugang biktima ang miabot sa police station ug positibong gitudlo ni Faye Ann Talisay ang duha nga mao say mitulis kaniya gikan siya misimba sa Basilica Minore del Sto. Niño ug gikuha ‘sab ang iyang class ring. Apan ang duha kusganong mihimakak sa mga pasangil ug miinsister nga nanaygon ra sila sa jeep. (/EIM)(BANAT NEWS)