Katabang gikawatan, gipusil kay misukol

CEBU, Philippines - Usa ka katabang ang gikawatan ug gipusil kagahapon sa  buntag diha sa eskina sa M.C. Quezon Street ug Nasipit Road, Barangay Talamban ning dakbayan sa Sugbo.

Ang biktima giila nga si Cheche Martinez, 23, lumad nga taga Poblacion Tabon, Dalaguete, ug usa ka katabang diha sa Town Homes, Nasipit, Barangay Talamban.

Matud pa sa kapolisan, ang biktima samtang naglakaw diha sa nahisgutang lugar, gihunongan sa duha ka wa mailhing lalaki nga nagsakay og motor.

Ang lalaki nga anaa nagsakay sa likod diretsong mition sa biktima og pusil  dungan sa pag-ingon niini og "hold-up."

Apan matud pa nagmagahi kini sa paghatag sa iyang cellphone hinungdan nga kini gipusil makausa ka higayon diha sa iyang paa ug gikuha ang iyang butang.

Ang biktima gidala dayon sa North General Hospital sa tabang sa usa ka gwardiya duol sa nahitaboan nga si Rene Aroiza. ( Joeylen A. de la Cruz, NORSU Intern/EIM) (BANAT NEWS)