Nagtan-aw og hantak gidunggab
CEBU, Philippines - Duha ka tawo ang gipangdunggab didto sa Mandaue ug Toledo -- ang usa samtang nagtan-aw og hantak ug ang laing biktima gihansakan og kutsilyo sa kapuyo sa iyang manghod.
Si Junbert Mediano, 29, taga Sitio Tondo, Barangay Tingub, dakbayan sa Mandaue gidunggab sa iyang umaabot nga bayaw nga si Romnick Alingaro, 25, taga Barangay Pagsabungan.
Si SPO1 Gregorio Cabizares, sakop sa Presinto 3 sa Mandaue City Police Office (MCPO), miingon nga nag-away si Alingaro ug ang iya nga kapuyo tungod kay ang babaye gusto nga molarga sa abroad.
Tungod sa kasuko ni Alingaro iyang gidauban ang VISA nga nakuha sa iyang kapuyo nga manghod ni Mediano aron sa pagsiguro nga dili kini madayon sa paglarga.
Ang kapuyo ni Alingaro midangop sa iyang maguwang ug nangayo’g tabang. Giadto ni Mediano ang kapuyo sa iyang manghod ug sila na usab ang nagkalalis.
Si Alingaro wala makapugong sa kaugalingon ug gidunggab niya si Mediano sa tiyan, buko-buko, bukton ug dayon nagdali nga misibat. Ang biktima gidala sa tambalanan sa dakbayan sa Sugbo.
Samtang nalungag ang tiyan sa 31-anyos nga si Emmanuel Broce human siya gidunggab sa suspetsado nga si Diono Deiparine, hingkod na ang pangedaron. Ang biktima ug ang suspek pulos mga minyo ug nagpuyo sa Sitio Baybay 1, Barangay Poblacion, Toledo.
Sa imbestigasyon sa kapolisan nahibaw-an nga si Broce nagtan-aw lang og hantak diha nga kalit lang siya nga giduol ug gidunggab sa suspek sa walay igong rason gamit ang ice pick diin maayong pagkaigo sa biktima sa iyang tiyan ug uban nga parte sa lawas. (BANAT NEWS)
- Latest
