TRO sa Toledo budget gilugwayan

CEBU, Philippines - Hangtud karon nagpabilin nga walay budget ang dakbayan sa Toledo human gilugwayan sa korte ang Temporary Restraining Order (TRO) sa P619 milyones nga annual budget.

Si Bise Mayor Antonio Yapha Jr. mibutyag nga gilugwayan ang tulo ka adlaw nga TRO og dugang 17 ka adlaw subay sa kamandoan ni Judge Hermes Montero sa Regional Trial Court Branch 59 sa dakbayan sa Toledo.

Niadtong Marso 27 giaprobahan ang annual budget sa Toledo apan hugot nga gisupak sa mayoriya sa konseho tungod sa pagkwestiyon sa legalidad niini. Gikatakdang dunggon sa korte sa adlaw’ng Lunes ang maong TRO ingon man ang giduso nga mosyon sa kampo ni Toledo City Mayor John Henry Osmeña.

Dugang ni Yapha nga moapelar sila sa Court of Appeals sa higayun nga magpabilin ang TRO. (/GMR)(BANAT NEWS)