OFWs way hadlok sa MERS-CoV

CEBU, Philippines - Wala mahadlok sa Middle East respiratory syndrome coronavirus (MERS-CoV) ang mga Overseas Filipino Workers dinhi sa Sugbo ug Central Visayas.

Gitug-an sa Philippine Overseas Employment Administration nga padayon ang pagtrabaho sa mga OFWs ngadto sa mga nasud sa Middle East taliwala sa pahimangno nga likayan ang pagduaw sa maong mga nasud aron dili kini mataptan sa makamatay nga virus.

Sumala pa ni POEA-7 Regional Director Evelia Durato nga wala mokunhod ang gidaghanon sa mga OFWs nga mibalik sa pagtrabaho sa Middle East.

Gani iyang gitumbok nga napuno na sa mga aplikante ang ilang buhatan alang sa Middle East.

Matud ni Durato nga wala pa’y abiso ang ilang labaw nga buhatan nga did-an ang mga OFWs nga makatrabaho sa Middle East tungod sa nahisgutang virus.

Kini ang hinungdan nga ilang gihatagan og kahigayunan ang mga OFWs nga makabiyahe pag-usab sa naasoy nga dapit.

Dugang pa ni Durato nga ang mga OFWs, bag-o o karaan, nitug-an sa ilang buhatan nga wala sila malisang sa naasoy nga virus ug ang ilang labing gikabalak-an ang kan-on sa ilang pamilya. Hinoon ang ilang buhatan wala magkulang sa paghatag og pahimangno sa mga OFWs nga magmatngon nga dili matakbuyan sa mga makahadlok nga sakit nga motumaw sa trabahoan niini sa gawas sa nasud. (/GMR)(BANAT NEWS)