Reserbang power supply sa VECO nihit pa gihapon

CEBU, Philippines - Gitug-an karon sa Visayan Electric Company (VECO) nga nagpabiling kritical ang supply sa kuryente dinhi sa Metro Cebu area tungod sa kainit karon sa panahon.

Sigon pa sa tigpamaba sa VECO, Theresa Sederiosa sa interbyu sa usa ka local nga sibyaanan nga gamay ra kaayo ang power reserve karong panahona tungod sa kadako sa demanda sa kuryente.

Matud pa ni Sederiosa nga gipangandaman na unta nilang daan ang pagsaka sa demanda sa kuryente niinging panahon sa ting-init tungod kay daghan man ang mogamit og mga appliances sama sa refrigerators, electric fans ug mga air condition units. Ang maong mga gamit matud pa kusog kaayong mokunsumo og kuryente.

Sumala pa ni Sederiosa, angayan unta nga 50 megawatts ang power reserve nga ihatag sa National Grid Corporation of the Philippines (NGCP) sa Metro Cebu tungod sa kadaghan sa mga edipisyo nga nagkinahanglan og dakong supply sa kuryente.

Hinuon gipahibawo ni Sederiosa nga ang VECO mihimo usab og lakang aron makatabang sa pagmenus sa demanda sa kuryente pinaagi sa pagbutang og solar panels niadtong mga residente nga buot makabaton niini.

Gibutyag niya nga gisugdan na nila ang pagpanaod og solar panels sa pipila ka mga kabalayan ug gani ubay-ubay na usab nga mga konsumidor ang miingon nga mikunhod gyud og 10 porsiyento ang ilang bayranan sa kuryente matag bulan sukad nga migamit sila og solar panels.

Sigon pa ni Sederiosa, mahimo usab nga ilang paliton ang mapundo nga power supply niini aron ikapuno ngadto sa mga area nga nanginahanglan og dugang power supply.

Dugang pa niini nga ang mga konsumidor nga interesado sa nahisgutang solar panel mahimong maka-apply sa buhatan sa VECO. (BANAT NEWS)