Gipusil sa tulisan luwas na
CEBU, Philippines - Nakalingawas sa kamatayon ang babaye nga gipusil dayon gilabnihan sa wala mailhing tulisan nga nagsakay og motorsiklo niadtong Miyerkules sa hapon diha sa Gotchoco Compound sa Barangay Alang-Alang dakbayan sa Mandaue City. Apan nadala sa mga tulisan ang shoulder bag sa biktimang si Ma. Teresa Ouano, 48, ang mga importante niining dokumento, P600 nga salapi ug mga ATM cards.
Si PO2 Jerome Lendio sa kapolisan sa Presinto 1 sa Mandaue City Police Office (MCPO) miingon nga si Ouano, kinsa nagpuyo sa Gotchoco Compound mao pa gyuy pagkanaug sa taxi dihang kalit nga gipusil sa aping ug dihang nahagba gikuha ang shoulder bag sa biktima dayong ikyas palayo.
Gidala ang biktima sa Mandaue City Hospital ug pagkahuman gibalhin sa pribadong tambalanan sa dakbayan sa Sugbo.
Ang direktor sa Mandaue City Police Office nga si Senior Superintendent Petronelli Baldebrin mipatawag og command conference sa miaging gabii alang sa paghimo og mga lakang sa pagsulbad sa nagkadaghang panghitabo nga mga pagpanglabni nga binuhatan sa riding in tandem sa siyudad. (BANAT NEWS)
- Latest
