Duha ka foreign shipbuilders balik sa bidding sa P18B frigate project sa PN

CEBU, Philippines - Giusab sa Department of National Defense ang nahauna nilang desisyon pagtangtang sa listahan sa mga bidders ang duha ka langyaw nga shipbuilding firms alang sa palitong bag-ong frigates alang sa Philippine Navy.  Matud pa ni Commodore Roland Mercado ang pangulo sa Navy technical working group nga ang Garden Reach Shipbuilders and Engineers Ltd. sa India ug ang STX France, ang misang-at og motion for reconsideration.

Mihangyo sa DND ang duha ka shipbuilders nga i-reconsider ang nauna nila nga desisyon ug paapilon sila, gitangtang sila sa bidding tungod kay kulang ang ilang mga papeles, matud pa sa report sa Philstar.com.

Matud pa ni Mercado nga mokabat og P18 bilyon ang kantidad sa maong kontrata kun ugaling ma-award na kini. 

Ang duha ka kompanya makig-kompetensiya unya sa laing upat ka kompanya nga gustong makuha  ang maong proyekto.

Matud pa ni Mercado nga nakigtagbo na ang mga opisyal sa DND ug sa Garden Reach aron maumol na ang final draft sa technical specifications sa maong frigates, samtang gimandoan ang komitiba nga susihon gyud ang kasko, power plant, communication systems, weapon systems sa mga design sa frigate.  (BANAT NEWS)