Tingog sa mamumuo mas angay paminawon inay sa mga politiko

CEBU, Philippines - Tingog sa mga mamumuo ang mas maayong paminawon inay ang mga taas kaayong bulatik sa mga mayor ug uban pang government officials, kini maoy  gipabuhagay ni Lapu-Lapu City councilor Eduardo Cuizon sa panagtigom sa mga mamumuo gikan sa upat ka mga siyudad sa Metro Cebu sa usa ka dakong mall sa North Reclamation Area kagahapon.

Si Cuizon maoy namahayag niini human giingong gilimitahan ang mga mamumuo sa pagpadayag sa ilang pamahayag atol sa gipahigayon nga Labor Day sa Cinema 7 sa SM kagahapon nga gipasiugdahan sa Siyudad sa Sugbo.   

Matud ni Cuizon, ang maong programa gibuhat alang sa mga mamumuo ug dili sa mga politiko. “Wa man po’y pag-unsa ni Mayor JVR (De Los Reyes) sa Talisay, ni Mayor Mike (Rama) sa Cebu City, or ni Konsehal Gabon sa Mandaue, pero mas igo na unta nga tagaan mi og gamay nga higayon, pero unsa naman nga mura’g pamulitika naman ni,” matud ni Cuizon.

Dugang niya nga kay dili man eleksyon karong panahona angay lang nga hatagan og higayon ang mga trabahante nga makapadayag sa ilang mga gibati. Apan, depensa ni Department of Labor and Employment 7 Assistant Regional Director Lilia Estillore nga ang programa limitado ra gyud kay tungod sa venue.

Matud ni Estillore, wala makaapil ang Lapu-Lapu sa ilang pulong-pulong hinungdan nga may miscommunication sa dagan sa programa.

Sa laing bahin diha sa dalan Colon, nag-abot usab ang nagkadaiyang labor groups nga mitawag sa ilang grupo nga Nagkaisa!  uban sa AMA-Sugbo-KMU  kagahapong adlawa.

Tagsa-tagsa nilang gipadayag ang kasagmuyo ngadto sa gobiyerno kay wa paminawa ilang mga reklamo sama sa kagamay sa suhulan ug ang kakulang sa proteksyon sa ilang mga katungod.  Gipasanginlan nila ang kasamtangang administrasyon nga anti-labor, nanawagan sila sa pagpausbaw sa suholan, ibasura ang Contractualization Law ug panawagan sa pagpatangtang sa mga labor officials nga nagmika sa ilang trabaho ug gipasanginlan usab nila nga pro-management o kadtong adto pusta sa mga kapitalista inay sa mga mamumuo.

Bisan managlahi kaniadto ang ilang mga gituohan ug mga isyu nga gikastigo sa gobiyerno, kagahapong adlawa, usa ray ilang tingog nga mao ang panawagan alang sa kaayohan sa labor sector.  (BANAT NEWS)