Mga bag-ong abogado nabawo, nagbagolbol

CEBU, Philippines - Nasagmuyo ang pipila ka Sugboanon nga bag-ohay lang nakapasar sa Bar Examination sa miaging tuig tungod sa pagka-oktaba sa ilang pagpanumpa sa katungdanan nga gikatakda unta kaniadtong Lunes.

Tungod niini si Atty. Elaine Bathan nga maoy presidente sa Integrated Bar of the Philippines (IBP) Cebu City chapter mipasabut nga may rason usab ang Korte Suprema pag-uswag sa oath-taking ceremony sa mga bag-ong abogado ug abogada. Nahibaw-an nga ang bug-at nga rason sa pagka-oktaba sa natakda na unta nga pagpanumpa sa katungdanan sa mga bag-ong abogado mao ang pag-anhi sa nasud ni US President Barack Obama.

Ang 1,174 ka bag-ong mga abogada ug abogado nga nakapasar sa 2013 Bar Examination naghinam-hinam na unta kaayo nga sila makahoral na isip mga “officers of courts.”  Matud ni Atty. Bathan nga normal lang sa mga nakapasar sa Bar Examination nga magbagolbol kay gahinam-hinam na sila nga maka-take oath sa ilang katungdanan apan nabaraw pag-anhi ni President Obama. (BANAT NEWS)