Napatay sulod sa drug den nalambigit sa mga krimen–CIB

CEBU, Philippines -  Gibutyag sa City Intelligence Branch sa Cebu City Police Office nga naapil sa ilang listahan sa mga target nga dakponon ang lalaking gipusil patay diha sa usa ka drug den sa barangay Day-as ning dakbayan sa miaging adlaw.

Ang gipatay nga si Rolan Colina giingon nga pag-umangkon ni Cebu City Vice Mayor Edgardo Labella.

Matud pa ni Police Chief Inspector Romeo Santander, hepe sa City Intelligence Branch sa CCPO nga notado nga tigpayuhot og drugas, tulisan ug naapil ‘sab kini sa pagpangarnap og mga motorsiklo dinhi sa dakbayan si Colina.

Sumala pa ni Santander, nasikop na si Colina sa kapulisan duha ka tuig na ang nakalabay ug gani kini napusilan pa  kini atol sa maong operasyon.

Base sa nakuhang impormasyon sa CIB, ilang nasayran nga adunay gipakigkitaan si Colina sa maong dapit ug giingon nga wala sila magkasinabot sa pagbahinay sa ilang ilegal nga negosyo hinungdan nga gipusil kini.

Apan gipasabot ni Santander nga bisan paman sa record sa biktima, andam gihapon sila nga motabang sa pagpangita sa mipusil patay ni Colina. “Despite of his record, affiliation we will have to do our job and find justice,” matud pa ni Santander.

Samtang sa pakighinabi sa mga tigbalita sa inahan sa biktima nga si Fe Colina, kini mibutyag nga ang iyang bana ig-agaw sa kasamtangan nga bise mayor dinhi sa dakbayan sa Sugbo. Si Fe miingon nga wala siya masayod nga nalambigit ang iyang anak sa mga krimen dinhi sa dakbayan.

Aduna na’y suspek ang kapulisan sa maong krimen nga naila nga sila si Emmanuel Richard ug usa ka Jolan Flores, nga padayon pa nga gipangita karon. Si Labella sa iyang bahin mibutyag sa Banat News nga makadaghan nang higayon siyang mitambag sa inahan ni Colina nga ipapriso kini.

“Dugay nako nagtambag ana sa inahan nga mas maayo pa nga naa siya sa sulod sa prisohan, kay kung naa siya sa gawas basin unsa unya’y mahitabo.

Parente gyud naku na sila sa side sa mga Colina, pero dili gyud ko molaban ana, especially ang kaso drugas, nadakpan naman na siya sa una.  Usa pud na siya sa mga notado sa amoang lugar, gani nasuspek pa na siya namo sa kawat sa amoa, nakuhaan ko og TV ug uban pang gamit, wala gyud ko nagkulang og tambag ana nila,” matud pa ni Labella nga nahinabi sa Banat News. (BANAT NEWS)