Pag-clamp sa mga sakyanan gisugdan na gabii

CEBU, Philippines - Gisugdan kagabii sa mga sakop sa City Traffic Operations Management (CITOM) ang pag-clamp sa mga sakyanan nga ilang nasakpan nga gi-parking lang daplin sa karsada ug nakabalda sa pag-agi sa ubang mga sakyanan.

Matud ni CITOM operations chief Joy Tumulak nga tulo ka team sa mga traffic enforcers ang ilang gimugna aron mosuroy ug gitahasan pag-clamp sa mga sakyanan nga masakpan nga anaa ra sa karsada gi-parking sa mga tag-iya hangtod na sa buntag.

Wala pa hinuon makahatag si Tumulak og kasayuran kun pila ka sakyanan ang ilang na-clamp sukad kagabii hangtod karong buntag nga ang mga tag-iya makabayad og multa nga P500 walay labot sa mga pending multahanan kun nadakpan sila kaniadto og gi-rekord lang sa Traffic Violations Bureau (TVB).

Kaniadtong Biyernes, ang radio operator sa CITOM mitug-an nga dul-an sa 100 ka sakyanan ang ilang gipapitlan og warning nga nagpasidaan sa mga tag-iya nga kalapasan sa balaod ang paggamit sa karsada isip ilang parking area.

Mga bombero nangreklamo tungod kay ang pagresponde nila sa nasunogan mabalda tungod kay kanunay sila nga mababagan sa mga sakyanan nga gi-parking ra daplin sa karsada. (BANAT NEWS)