Kagumkom nga litson gisakmit

CEBU, Philippines - Duha ka kagumkom kaayo nga pagkaluto nga litson gisakmit   sa mga meat inspectors sa dakbayan sa Mandaue kay ang pag-ihaw sa hayop walay permit.

Si Dr. Daisy Penetrante nga maoy veterinarian sa dakbayan sa Mandaue mitug-an nga ang duha ka litson gisakmit nila didto sa Barangay Mantuyong ug Barangay Casuntingan kagahapon sa kaadlawon.

Matud ni Penetrante ang iyang mga meat inspectors nagpahigayon og operation human sila makadawat og kasayuran nga ang Daddy’s Angel’s Lechon ug Baclohan Lechon nakalapas sa lagda.

Ang lagda nga gilatid sa National Meat Inspection Service (MVIS) mao nga kadtong gusto nga moihaw og kahayopan alang sa negosyo kinahanglang kuhaan gayud og permit.

Ang mga meat inspectors mosusi usa sa kahayopan aron pagsuta kun wala ba kini mga sakit nga posible nga makadaut sa panglawas sa mga tawo nga makakaon.

Ang kalapasan nga nahimo sa duha ka tigbaligya ug mao ang Administrative Order Series of 1975 nga naglatid nga ang pag-ihaw og kahayopan kinahanglang adunay permit sa mga meat inspectors.

Gitataw ni Penetrante nga mailhan ang mga hayop nga nag-agi sa mga inspector tungod kay makita man ang tatak niini gikan sa ilang opisina.

Matud ni Penetrante nga ang gisakmit nila nga litson ihatag nila sa mga charitable institutions, sama sa prisohan. (BANAT NEWS)