CCPO naalarma sa nagsunod nga tulis ug lungkab
CEBU, Philippines - Naalarma na karon ang kapulisan sa dakbayan sa Sugbo nunot sa sunod sunod nga tulis ug pagpanglungkab sa nangaging mga adlaw.
Sumala pa ni Police Chief Inspector Romeo Santander ang hepe sa Criminal Investigation Branch CIB, nga tukion nila sa tanang mga hepe sa Theft and Robbery Section ug police station chiefs nga dunay daghang kaso sa lungkab, kawat ug tulis sa ilang hurisdiksyon kung unsay ilang buhaton sa maong mga krimen.
Si Santander miingon nga si Sr. Supt. Noli Romana naalarma na sa maong mga hitabo ilabi na mga pagpanulis sa mga pasaheroan.
Niadtong Sabado sa hapon, duha ka mga pagpanulis ang nahitabo sa duha ka managlahing jeep pasaheroan. Usa niini ang 13C route diha sa habig sa barangay Hipodromo, apan paglabay og 30- minutos lain na sab nga tulis sa usa ka 04L nga pasaheroan sa may IT Park Lahug .
Namatikdan nga susama og estilo ug hinagiban nga gigamit ang mga tulisan sa maong duha ka insidente, usa ka icepick ug usa ka armas.
Nagduda si Santander nga gikan sa silingan sa mga silingang siyudad ug lungsod ang maong mga tulisan. Samtang sa kaso sa pagpanglungkab ug pagpangawat, niabot na og kapin napulo ka mga kaso ang na-report sa kapulisan niadto lang adlaw nga Sabado ug Domingo. (BANAT NEWS)
- Latest
