Pagmahal sa commercial rice makaayo sa mga mag-uuma
CEBU, Philippines - Nagtoo ang kadagkoan sa National Food Authority (NFA)-7 nga ang mga mag-uuma mas makabentaha kun magpabiling taas ang prisyo sa baligya nga commercial rice kay hayan mosaka usab ang kantidad sa ilang baligya’ng humay.
Ang tigpamaba sa NFA-7 nga si Ma. Lucia Rosales naglaum nga kun mosaka usab ang prisyo sa pagpalit sa mga humay gikan sa mga mag-uuma makabawi sila sa ilang gasto sa fertilizers, chemicals nga gigamit sama sa pag-spray sa mga tanom.
Si Rosales hinuon miingon nga ang mahimong makalolooy mao ang mga konsumidor kay mahal na man ang prisyo sa bugas nga ilang paliton diha sa kamerkadohan.
Ang NFA-7 daan na nga nitug-an nga dili sila makapugong sa pagsaka sa prisyo sa commercial rice apan ilang gitataw nga angayan nga ang mga konsumidor mopili sa NFA rice kay nagpabilin kini sa P27 ang matag kilo.
Gipahimangnoan sa NFA ang mga pumapalit nga magmatngon sa mga abusado nga negosyante nga mobaligya og bugas nga sambugan og bati nga matang aron modako ang ilang ganansiya. (BANAT NEWS)
- Latest
