Kapolisan trabaho gihapon bisan nihit ang gasoline
CEBU, Philippines - Ang kalihukan sa kapolisan dinhi sa dakbayan sa Sugbo wala g’yud maapektohi sa gihimong lakang sa City Hall pagputol sa kontrata tali sa fuel supplier – ang Phoenix Petroleum Company.
Si Chief Inspector Romeo Santander, hepe sa Cebu City Intelligence Branch, mibutyag nga bisan pa og magnihit ang suplay sa gasolina sa City Hall ang kapolisan mopadayon gihapon sa ilang serbisyo.
“Dili maapektuhan ang operasyon sa kapolisan bisan og nagkuwang ang supply sa gasolina sa Cebu City Hall,†matud ni Santander.
Giangkon ni Santander nga 75 porsiyento sa supply sa gasolina nga gigamit kada-adlaw sa Cebu City Police Office gikan sa City Hall apan wala kini magpasabot nga dili na sila epektibo sa ilang serbisyo kun ibanan ang ilang supply nga gasolina.
“We need to adjust and whatever ang mahatag sa city government we will utilize it,†ni Santander.
Ang City Hall mopahigayon pa og bidding aron mangita og lain nga supplier human nila putla ang kontrata sa Phoenix Petroleum nga miundang paghatod og gasolina ug krudo kaniadtong Lunes.
Ang rason sa paghunong sa Phoenix Petroleum pag-supply og gasolina sa dakbayan mao ang moabot og P30 milyones nga wala pa kabayri sa City Hall. (BANAT NEWS)
- Latest
