Mga gipanganlan ni Napoles nga nakasapi sa pork barrel scam angay panganlan–Cayetano

CEBU, Philippines - Giawhag  ni Senador Alan Peter Cayetano nga ipublikar ang mga pangalan sa tanang opisyal nga gilambigit sa negosyanteng si Janet Lim -Napoles nga nalambigit sa P10 bilyones nga Priority Development Assistance Fund(PDAF) scam.

Nasayran nga usa ang ngalan ni Senator Cayetano nga migawas sa listahan nga gihatag sa gipasanginlang pork barrel scam mastermind nga si Napoles.

Apan si Cayetano kinsa maoy pinasidunggang dinapit sa Cebu Newsmen’s Cooperative General Assembly kagahapon miingon nga angayang palawman pa gyud ang pagsusi sa maong isyu tungod kay daghang mga tawo ang gusto mobulabog sa imbestigasyon.

Tungod niini nanawagan si Cayetano nila ni DOJ Sec. Leila De Lima ug kanhi senador Panfilo Lacson nga ipagawas ang listahan sa mga ngalan nga nalambigit sa pork barrel scam. Gihulagway ni Cayetano nga dili segurado nga kadtong mga ngalan nga gipagawas ni Napoles tinuod.

Gani gipadad-an na og suwat hangyo ni Cayetano ang COA nga tan-awon ang iyang PDAF ug uban niyang transakyon aron pagsiguro nga walay bogus non-governmental organization ni Napoles nga iyang gigahinan sa iyang pork barrel. Asoy usab niini nga kung adunay makapamatuod nga ang alegasyon batok kaniya di kini magduha-duha sa pagluwat sa iyang katungdanan ug pagreport sa Ombudsman aron siya kasuhan.

Dili lang ang pagpagawas sa lista maoy gusto sa senador apan lakip na ang pagpahigayon og hearing kang Napoles ug wa usab niya ilimod nga aduna siyay mga pagduda kalabot sa kalit nga pagbali ni Napoles. Di pabor si Cayetano nga mahimong state witness si Napoles tungod kay ang DOJ ug Ombudsman na ang miingon nga airtight na ang kaso nga nagpasabot nga bisan unsa pa may mahitabo si Napoles mapriso ra gihapon.

Nanghinaot si Cayetano nga di moubos ang standard sa gobyerno sa pagkuha og state witness tungod kay dakong insulto sa mga Pilipino ang gusto ni Napoles.  (BANAT NEWS)