Kanhi polis na-buy-bust

CEBU, Philippines - Nasikop sa kapolisan ang duha ka mga lalaki lakip ang usa ka nagpailang kanhi sakop sa Police Center for Aviation and Security kon PCAS 7 ug kuhaanan kini og shabu pinaagi sa usa ka buy-bust operations sa Lower Matumbo, Brgy. Pusok dakbayan sa Lapu-Lapu sa milabay’ng gabii.

Ang nasikop mao si Roberto Albe Sarsalejo alyas Tata, 50, residente sa maong dapit ug ang usa ka gipasanginlang level 3 drug pusher nga si Marcelo Flores, 45, residente sa Brgy. Timpok dakbayan sa Lapu-Lapu.

Nakuha gikan ni Sarsalejo ang usa ka gamay nga pakete sa gituhuang shabu, marked money nga balor P200, P2,800 cash nga  gituhuang halin niini sa shabu, usa ka kalibre .9mm pistol nga adunay sud nga upat ka bala ug drug paraphernalia. Samtang nakuha gikan ni Llanto ang usa ka gamay’ng pakete sa shabu ug usa ka bultong pakete nga gituhuang shabu.

Matud pa ni  Senior Inspector Rogelio Pineda, hepe sa City Anti-Illegal Drugs Special Operation Task Force ang duha maoy target sa ilang buy-bust operation human sila nakompirmar sa surveillance nga namaligya og drugas sa maong dapit.

Lakip sa nakuha sa mga operatiba mao ang usa ka pitaka nga adunay sud nga ID ug pekeng passport ni Sarsalejo.  Usa ka ID usab ang nagpakita nga sakop si Sarsalejo sa PNP Aviation Security.     Apan si Sarsalejo mipadayag nga dugay na siyang na-discharge sa serbisyo human kini miapil sa kudeta.Si Pineda mosusi pa sa background ni Sarsalejo.

Matud pa ni Pineda lima ka adlaw pa lang nilang gi-evaluate ang maong kaso nga gi-text sa usa ka nagpakabana ngadto ni Lapu-Lapu City OIC Director Senior Superintendent Armando Radoc.

Ang pagkasikop sa duha mao nay ika- 15 ka tawo nga nasikop ug napasakaan og kaso kalabot sa kampanya sa illegal drugs sud sa duha ka semana. (/EIM)(BANAT NEWS)