Mga suroyan nga kawani sa Talisay pagbantay!

CEBU, Philippines - Mga regular nga kawani sa Talisay City Hall ibanan sa ilang leave credits kun dili mogamit og pass slip panahon nga mogawas sila sa ilang opisina atol sa office hours bisan kun motambong sila og official business.

Ang mga job order (JO) workers kaltasan sa ilang sweldo kun dili mogamit og pass slip sa paggawas nila sa ilang mga opisina.

Si Talisay City Mayor Johnny De los Reyes miluwat sa Memorandum No. 2014-225 niadtong miaging semana aron masiguro nga ang mga kawani sa Talisay dili maglakwatsa.

Ang mga sakop sa Civil Security Unit (CSU) nasuta nga dunay mga empleyado sa City Hall nga wala mogamit og pass slip panahon nga mogawas sila sa ilang opisina atol sa oras nga ting-trabaho.

Ibutang diha sa pass slip kun unsa’ng orasa migawas ang usa ka kawani, asa kini paingon ug unsang orasa mibalik.

Si De los Reyes mipasidaan nga kadtong mga regular nga kawani nga  mapakyas sa paggamit og pass slip kun mogawas kini sa ilang buhatan alang sa official business kaltasan ang ilang leave credits.

Ang pagkaltas sa ilang leave credits magbase kun pila sila ka oras o minuto nga mibiya.  (BANAT NEWS)