Mimahal na ‘sab ang gasolina ug krudo

CEBU, Philippines -  Laing oil price increase ang gipatuman kagahapong adlawa sa mga dagkong oil companies dinhi sa Sugbo.

Sugod sa alas 6:00 ang takna kagahapon sa buntag, ang Petron, Shell ug Sea Oil mipatuman og 50 sentimos nga usbaw sa prisyo sa mata’g litro sa gasolina ug krudo. Gipausbawan usab sa naasoy nga mga kompanya sa lana og 70 sentimos ang prisyo sa mata’g litro sa kerosene.

Sigon sa kadagkuan sa naasoy nga mga kompaniya sa lana nga ang pagsaka sa prisyo sa produkto sa petrolyo sa World Market maoy hinungdan sa pagpa-usbaw usab nila sa ilang petroleum products.

Gipaabot usab nga mosunod og pausbaw sa ilang prisyo sa petroleum products ang ubang mga oil companies.

Ang mga drayber sa pampublikong sakyanan mitiyabaw na sa laing price increase sa mga petroleum products kay nagpasabot kini nga mokunhod usab ang ilang kita mata’g adlaw.

Samtang ang mga konsumedor nabalaka niining laing pagsaka sa prisyo sa lana kay dako ang posibilidad nga mosaka usab ang kantidad sa nag-unang mga palaliton.   (BANAT NEWS)