Aron mapugos pagpahinay ang mga drayber

CEBU, Philippines -  Gipatiltilan sa traffic section sa kapolisan sa dakbayan sa Danao ang pipila ka mga dalan nga ilang namatikdan nga kanunay mahitabo ang aksidente nga maoy hinungdan nga daghan na ang kinabuhi nga nakalas.

Si SPO1 Reynante Manulat,  imbestigador sa traffic section sa Danao Police Station, miila sa mga dalan national sa maong dakbayan nga sagad mahitabo ang aksidente mao ang upland nga bahin sa Barangay Maslog,  Barangay Guinsay ug Barangay  Dunggoan.

Matud ni Manulat nga kaniadtong miaging Semana Santa ilang natala ang walo ka aksidente nga ang kadaghanan sa mga nalambigit mao ang motorsiklo nga kusog kaayong nagdagan subay sa dalan sa nahisgotang lugar ug mawad-an sa control ang drayber nga maoy hinungdan nga nabangga kini ngadto sa laing sakyanan.

Dugang aksidente nga nahitabo mao ang pagkabangga sa Honda XRM nga motorsiklo nga gidala ni Maruin Holnanero, 21, nga taga Sitio Carajay, Barangay Gun-ob, dakbayan sa Lapu-Lapu.

Si Holnanero namatay ug grabe usab ang kahimtang sa nag-angkas niini nga si Jesson Peñes, 30, nga taga Barangay Cogon, Compostela.

Ang motor nga gidala ni Holnanero nagsubay sa dalan national sa Barangay Maslog ug napunggit niini si Florenia Alcaria, 72, nga taga Barangay Lahug, dakbayan sa Sugbo samtang milabang kini sa karsada.

Human madasmagi ni Holnanero ang tiguwang didto siya mahipunta sa Ceres bus nga gimaneho ni Richard Habuhab, 39, nga taga Bonbon, Aloguinsan.

Matud ni Manulat nga nakahukom sila sa pagpatiltil sa maong mga dalan nga sementado nga ilang namatikdan nga kompiyansa kaayo ang nagsakay og motorsiklo nga mohanoy lang sa ilang pagpadagan ug sa ilang pagpatiltil ang mga drayber mapugos sa pagpahinay sa pagpadagan sa ilang paglabay sa maong lugar. (BANAT NEWS)