Shabu positive gitaktak na

CEBU, Philippines - Kadtong lima ka kawani sa usa ka placement agency nga namatud-ang positibo sa paggamit og shabu didto sa Kapitolyo gitaktak na sa ilang trabaho.

Sakop sila sa LBP -Service Corporation nga gidistino didto sa Kapitolyo apan gitaktak sila sa trabaho human nga namatud-an sa confirmatory test nga sila tiggamitan gyud og drugas.

Matud ni Denise Camero, representante sa placement agency, nga ang lima wala na usab motunga pa sa ilang trabaho sukad niadtong Abril 8 mao nga giisip na sila nga natangtang na.

Ang lima kabahin sa 169 ka empleyado sa Kapitolyo nga gihimoan og drug test human mapili ang ilang mga ngalan pinaagi sa computer-generated random selection process. Ang mga sakop sa Committee on Discipline and Investigation nagdiskutir pa kun unsa ang angay’ng silot nga ipahamtang sa usa ka regular ug tulo ka kaswal nga kawani nga positibo sa shabu.

Ang pag-drug test sa mga kawani gitugot sa balaod diin bisa’g kinsa nga opisyal o empleyado. (BANAT NEWS)