Tulo ka hubog nalumos, Bata nalumos ‘sab

CEBU, Philippines - Tulo ka tawo nga gituohang pulos nakainom ug laing menor de edad ang nangalumos sa managlahing insidente sa lalawigan sa Sugbo atol sa weekend.

Si Novo Gorgonio, 12, nga taga Sitio Planta, Barangay Poblacion, ang nalumos samtang naligo sa swimming pool sa dihang paingon na unta sila mamauli adtong miaging hapon sa Louie Beach resort sa Barangay Tajao, Pinamungajan.

Sumala pa nga padung na untang mamauli ang pamilya sa biktima dihang kalit kining midagan pagbalik sa swimming pool kauban ang iyang mga amigo apan giingong didto kalit kining nalumos.

Pipila ka oras ang nakalabay, usa ka 59 anyos nga construction worker ang nalumos usab sa Barangay Guiwanon, Barili mga alas 6:45 sa gabii.

Si Jose Libradilla giingong nakainom kini samtang sakay sa iyang sakayan sa dihang milayat kini sa dagat apan wa na makabalik sa iyang sakayan hangtud nga nalumos.

Sa Tabuelan, usa ka Erwin Pautan, 32, nga taga Barangay Kantubaon, nalumos usab sa Maravilla Beach Resort sa Barangay Maravilla Sabado sa udto.

Matud pa nga nag-inom ang biktima uban sa mga amigo niini sa dihang mibiya siya aron maligo sa dagat apan nahibulong ang kauban niini kay wala na kini mibalik hinungdan nga ila kining gipangita hangtud nga nakit-an kining naglutaw na sa dagat ug wa nay panimuot. Patay na kini pag-abot sa Tuburan District Hospital.

Sa San Remigio, laing hubog nga si Panfilo Maglasang, 58, taga Barangay Batad, nalumos usab human kini nangisda sa baybayon sa ilang dapit apan iyang lawas gianod na didto sa sitio Nangka, Barangay Lambusan mga alas 9:00 sa gabii adtong Sabado.

Ang kapolisan subling mipahimangno sa katawhan nga likayan ang pagsawom sa lawom nga bahin sa tubig kun nakainom. (BANAT NEWS)