Mga polis ug bombero alerto
CEBU, Philippines - Ang kapolisan ug kabomberohan sa dakbayan sa Mandaue gimandoan nga alerto kanunay gikan karong adlawa hangtud na sa Domingo aron makaresponde dayon sila kun adunay panginahanglan.
Si SFO3 Roy Garcia, chief investigator sa Bureau of Fire Protection (BFP) sa dakbayan sa Mandaue, miingon nga gimandoan sila ni Fire Marshall Joel Abarquez nga kanselahon ang ilang pagbakasyon.
Ang tumong niini aron adunay mga bombero nga makaresponde dayon kun adunay mga moulbo nga sunog. Ang mga tagbalay hinoon giawhag sa kabomberohan nga dili biyaan ang ilang balay nga adunay mag-on nga appliances.
Samtang ang direktor sa Mandaue City Police Office (MCPO) Petronelli Baldebrin mipaalerto usab sa kapolisan sa unom ka presinto nga destinohan og mga polis ang mga simbahan nga hugopan sa mga tawo.
Apan gipaabot nga sugod karong adlawa, modagsang usab ang mga tigbakay. Ang kapolisan giawhag nga pangdakpon ang mga magpasiugda og tigbakay sa lainlaing dapit.
Si Inspector Diosdado Malazarte, hepe sa Presinto 2, midistino og unom ka polis sa North Bus Terminal sa Barangay Subangdaku aron pagsiguro sa mga pasahero nga mobiyahe ngadto sa amihana’ng kalungsoran. (BANAT NEWS)
- Latest
