P1M cash ug alahas nakawat

CEBU, Philippines -   Gisakiyo sa kawatan ang gibanabanang P1 milyon nga kantidad sa mga alahas ug salapi sa gilungkab nga Sofmor Trader’s International Corporation sa North Reclamation Area, Barangay Center, dakbayan sa Mandaue.

Si Senior Inspector Jimmy Portes, hepe sa Investigation Detection and Management Bureau (IDMB) sa Mandaue City Police Office (MCPO) miingon nga ang tag-iya ug tagdumala nga si Farurkh  Ahmad Nadeem nga usa ka Pakistan national  mitug-an kanila nga ang mga kawatan nakasulod sa ilang buhatan pinaagi sa pagguba sa ilang pultahan.

Ang ilang steel cabinet nga gisudlan sa 2.45 gramos nga kuwentas nga adunay diamond, salaping dolyares ug Japanesse Yen nga mobalor P200,000.00 ug P230,000 maoy nakuha sa kawatan.

Giimbestigar karon ang gwardiya kansang pangalan wala pa ibutyag sa kapolisan nga nagbantay nianang gabhiuna gumikan kay di makatuo ang mga imbestigador nga giguba ang pultahan ug giguba ang steel cabinet nga wa gyud niya mabantayi. (BANAT NEWS)