MOdus sa taxi driver

CEBU, Philippines - Usa ka babaye nangayo’g tabang sa kapolisan kay nahanaw ang iyang pitaka nga may sulod nga kwarta ug alahas pagsakay niya’g taksi og dako ang iyang pagtoo nga may kalabotan ang drayber sa pagkahanaw.

Si Irish Hui Poloyapoy, 25, minyo nga taga Barangay Bato, dakbayan sa Toledo midangop sa Theft and Robbery Section (TRS) sa Cebu City Police Office (CCPO) aron makuha pagbalik ang iyang pitaka.

Matud ni Poloyapoy nga misakay siya og taksi paingon sa Sacred Heart Church sa dalan D. Jakosalem aron pagtambong og bunyag sa anak sa iyang amiga.

Sa likod nga lingkoranan unta siya milingkod apan gipabalhin siya sa drayber sa atubangan tungod kay matud pa kuwang og hangin ang ligid sa atras nga bahin sa taksi.

Pag-abot nila sa Sacred Heart Church, naglisud si Poloyapoy sa pag-abli sa pultahan mao nga gitambagan siya sa drayber nga gamitan niya og duha ka kamot ang pag-abli.

Si Poloyapoy miingon nga mitabang pa gani ang drayber sa pagkawhat aron maabli ang pultahan.

Didto na sa simbahan nga nabantayan ni Poloyapoy nga nahanaw na ang iyang pitaka nga adunay sulod nga P2,500, ug duha ka gold necklace nga nagkantidad og P100 mil.

Nagduda g’yud si Poloyapoy nga gituyo sa drayber sa taxi kun asa siya molingkod. Ang Close Circuit Television (CCTV) camera sa mao nga dapit nagpakita nga usa ka KJ and J taxi, body number 5217 ang gisakyan ni Poloyapoy.

Nakig-alayon na ang kapolisan sa Land Transportation Office (LTO) ug Land Transportation Franchising and Regulatory Board (LTFRB) aron makatabang sa imbestigasyon.   (BANAT NEWS)