Kampeyon Pagbalik

CEBU, Philippines - Atubangan sa 15, 601 nga mga boxing fans didto sa MGM, gitinuod ni Pacquiao ang iyang  saad nga ipakita ang iyang karaang kusog ug kapaspas human niya gilumsan sa kumo si Bradley kinsa nakatilaw sa labing una niyang pilde.

Human sa dose ka hugna nga sinukmagay, ang kamot sa Pambansang Kamao ang giisa nga mananaug pinaagi sa unanimous decision.

Napilde siya pinaagi sa split decision ni Bradley sa una nilang sangka niadtong tuig 2012, apan giseguro niya kagahapon nga dili na kini mahitabo human niya gilupig sa puntos ang Amerikanong boksidor.

Sila si boxing judges Michael Pernick ug Craig Metcalf pulos mihatag og 116-112 ngadto ni Pacquiao, samtang si Glenn Trowbridge adunay 118-110 score ngadto ni Pacquiao.

Kining tigsulat mihimo usab og kaugalingong scoring adunay 117-111 ngadto ni Pacquiao.

Si Pacquiao kinsa garantisado nga modawat og $20 million, mipalambo sa iyang record ngadto sa 56-5-2 (38KOs), samtang si Bradley nakatilaw sa labing una niyang pilde sud sa 32 ka away. "Pacquiao did pretty well. We did not expect that Bradley will attack. He hurt Manny in the fourth but Manny came back in the seventh round and I thought from that moment on he's already done with the fight," matud pa sa trainer ni Pacquiao nga si Freddie Roach atol sa post-fight press conference.

Itandi sa una niyang sangka ni Bradley, ang eight-division world champion mipakita og dakong kalambuan sa iyang lihok  ug bisan pa og agresibo, mas inutok usab ang estilo niya sa pakigsangka.

"I'm satisfied with my performance. My opponent is good and he hit me with a couple of good shots, but I managed it all. I also tried to finish him off by throwing a lot of punches, but he was just tough. The Bradley I fought two years ago is very different now. He's improved a lot," matud pa ni Pacquiao kinsa nakahiagom og 32 ka tahi sa iyang kilay human magisii tungod sa head butt ni Bradley sa 12 round. "This fight is very important for me and I'm happy that I won. My boxing journey will continue," dugang pa sa 35-anyos nga si Pacquiao.

Mibomba dayun si Pacquiao sa sayung bahin sa away diin kapila niya natay-og si Bradley gamit ang iyang left straight, apan mihinay siya sa mga misunod nga round nga mihatag og kahigayunan ni Bradley nga makontrolar ang tunga-tungang bahin sa away. Hinuon, daling mibalik si Pacquiao ug mipakita sa iyang eksperiyensya sa ikapitong round diin gipauwanan niya og nagpungasi nga kombinasyon si Bradley.

Sa ninth round nakita nga mibalik na ang kabangis ni Pacquiao human niya gikulata si Bradley kinsa misandig sa pisi. Ang maong atake nakapaluya ni Bradley nga nagsaguyod nga mibalik sa iyang korner.

"I have no excuses. Pacquiao is the better fighter tonight.  He shows what he's made of and that he still has it. One thing I love about Pacquiao is that he never ducks from any opponent. I respect him much for that," matud pa ni Bradley.

Si Roach mibutyag nga gusto niya nga mahitabo ang fifth fight ni Pacquiao ug ni Mexican legend Juan Manuel Marquez sa dili pa isunod ang ‘super-fight’ niini batok ni Floyd Mayweather."We'll Marquez is a big fight for us if he wins his next fight," matud pa niya.

6th  district malinawon atol sa Pacquiao-Bradley fight

Nagmalinawon ang ikaunom nga distrito sa lalawigan sa Sugbo ingon man sa Talisay City atol sa sangka nila ni Manny Pacquiao ug Timothy Bradley kagahapon sa buntag.

Ang mga traysikol drayber sa dakbayan sa Mandaue ug Talisay City ug mga PUJ drayber mihunong sa ilang pagbiyahe ug didto nagtapok sa pagtan-aw sa telebisyon sa ilang panimalay ug ang pipila sa mga tindahan nga nahimutang duol sa ilang parkingan.

Si  Lito Palipas, 45, taga Ibabao, dakbayan sa Mandaue ug drayber sa PUJ nga nagbiyahe sa Ayala ug Ibabao Estancia miingon nga alas-4 pa kagahapon sa  kaadlawon siya nga nagsugod og pamasahero aron makagarahe siya pagkaalas-9 kay motan-aw siya sa sangka.     

Si PO1 Marlon Gravila nga maoy radio operator sa Mandaue City Police Office (MCPO) miingon nga sa 27 ka barangay sa dakbayan nga gilangkoban sa unom ka presinto wala sila makadawat og alarma sa pagpamusil, pagpanunggab, panglabni  ug uban pa.

Samtang si PO1 Albert Jiminez sa kapolisan sa lungsod sa Consolacion miingon nga atol sa kombate nila ni Pacquiao ug Bradley kagahapon wala usab sila makadawat og alarma.

(Romeo T. Limpangog/EIM)(BANAT NEWS)