Drug pusher gidakop

CEBU, Philippines - Gidakop sa kapolisan sa Argao ang giingong “level 2” nga drug pusher sa mao nga lungsod human nila rondaha ang iyang panimalay sa Barangay Poblacion kagahapon ug nasakmitan kini og duha ka bulto nga shabu.

Nakalitan si Edgardo Catipay diha nga kalit nangabot ang kapolisan sa Argao uban sa mga sakop sa Regional Safety Battalion nga mialirong dayon sa iyang panimalay alas nueve kagahapon sa buntag.  Usa ka higala ni Catipay nga si Francis “Eric” Alviola giapil pagdakop kay didto kini sa balay sa suspetsado’ng pusher ug nakuhaan sa kapolisan og .380 nga pistola.

Matud ni Argao Police chief Alejandro Batobalonos nga ang pagronda nila sa panimalay nga gipuy-an ni Catipay gibasi pinaagi sa search warrant nga giisyu ni Regional Trial Court (RTC) Judge Gilbert Moises.

Ang huwes sa Argao mitambag sa kapolisan nga adto lang mokuha og search warrant sa hukmanan dinhi sa dakbayan sa Sugbo aron masiguro nga dili mo-leak ang impormasyon nga plano sa kapolisan pagronda sa balay ni Catipay.

Nahibaw-an nga sagad sa mga kawani sa RTC Argao mga molupyo sa mao nga lungsod ug dili imposible kun adunay pipila kanila nga suod ni Catipay.

Ang report nagkanayon nga ang mga tigbaligya og ilegal nga drugas adunay gibayran nga tigpaniid sa mga hukmanan aron mopahibalo dayon kanila kun adunay moaplay og search warrant.

Gawas sa duha ka bulto nga shabu, aduna pa’y 19 ka laing gagmay nga putos sa shabu ug ang tanang ilegal nga drugas gibana-bana nga mokantidad og P50 mil.   (BANAT NEWS)