Coastal clean-up sa kapolisan sa Talisay
CEBU, Philippines - Ang Talisay City Police nagpahigayon og clean-up drive kagahapon sa buntag sa mga coastal area sa dakbayan.
Ang maong kalihukan gipangulohan sa hepe sa Talisay City police station nga si Superintendent Reycel Carmelo Dayon.
Usa kini sa tampo sa kapolisan aron mapalimpyo ang palibot sa Talisay nga anaa sila madistino, ilabi na ang kabaybayonan.
Si Dayon miingon nga ang tumong sa programa mao ang pag-edukar sa katawhan nga nagpuyo daplin sa kabaybayonan nga mamahimo sila nga responsable sa paglabay sa ilang mga basura.
Una kini nga clean-up drive nga gilusad ni Dayon human siya miasumer sa pagka-acting chief sa Talisay diin giabagan siya sa mga sakop sa Fishermen Sea Ecological Care (FISECA).
Nakatigum ang kapolisan ug pipila ka garbage bags nga mga sagbot sama sa mga laya nga dahon, plastic nga putos, ug mga diapers nga kasagarang ipanglabay lang sa mga wala’y pagpakabana nga molupyo.
Ang clean up drive sa Talisay gisugdan sa kabaybayonan sa Barangay Pooc hangtod na sa baybayon sa Poblacion. Matud ni Dayon nga himoon nila ang pagpanglimpyo mata’g buwan. (BANAT NEWS)
- Latest
